Од 500 до 1.000 евра по квадрат - еве како се движи цената на становите низ Македонија

За само едно тримесечје продажбата на станови се намалила за 35%, но цената по метар квадратен расте. Според податоците од Агенцијата за катастар, во вториот квартал годинава, во екот на пандемијата, се реализирале скоро 3.200 продажби, односно за околу 1.700 помалку од претходниот квартал.

Но, цената на становите расте. Во главниот град најмногу поскапеле становите во Центар, Ѓорче Петров и Гази Баба, каде просечната цена за метар квадратен се зголемила за педесетина евра.
Кисела Вода е единствената општина каде е регистриран пад на цената за 10 евра.

Слична е состојбата и во другите поголеми градови низ земјава.
За дури 100 евра поскапо се продавал метар квадратен во Кочани, а во Струга и Битола цената за квадрат скокнала за околу 50 евра.
Поефтини биле недвижнините во Струмица и Куманово, каде цената паднала за 60, односно 70 евра по квадрат.

Градежниците велат дека растот на цените на становите е очекуван поради поскапувањето на градежните материјали, работната сила, но и поради сè поквалитетните градби.

Познавачите очекуваат дека трендот на поскапување на становите нема да запре дури и во услови кога економијата паѓа, бидејќи за луѓето недвижнините се сигурна инвестиција.

Според Катастар, во моментов има околу 6.500 новоизградени непродадени, а двојно повеќе станови се во градба.