Општина Ѓорче Петров ќе добие нова детска градинка со капацитет за 150 деца. Просторија од основното училиште Ѓорче Петров во населба Дексион ќе се пренамени и адаптира во детска градинка. Градежните работи се веќе во тек и се очекува веќе наредната година, најдоцна во март да започне со работа како нова современа детска градинка.
Увид денеска извршија министерот за труд и социјална политика Диме Спасов и градоначалникот на општина Ѓорче Петров Сокол Митровски.
Министерот Спасов истакна дека ова е втора градинка на МТСП во оваа општина и посочи дека и минатата година била отворена детска градинка со капацитет за 50 дечиња во која биле вложени 4 милиони денари .
-Во овој објект кој сега се реконструира инвестираме околу 3 милиони денари и очекува за еден месец да завршат градежните активности, а потоа општината во соработка со градинката ќе го опремат просторот и градинката ќе ги има сите функционалани содржини за сите групи на дечиња од предучилишна возраст, истакна министерот.
Спасов посочи дека оваа општина има потреба од повеќе детски градинки и истакна дека во оваа општина нема да застанат инвестициите. Тој најави дека и во 2016 година ќе биде направена уште една градинка во рамки на училиштето „Димитар Беровски“.
-И понатаму продолжуваме со активности за зголемување на капацитетите за згрижување на деца од предучилишна возраст. Во моментов МТСП инвестира во 14 општини за нови 14 детски градинки и со тоа ќе се влијае да се зголеми опфатот на деца од предучилишна возраст во рамките на детските градинки во Р. Македонија, како и создавање на објекти во општините каде што досега воопшто немало детски градинки, а со тоа ќе се влијае во делот на подобрување на квалитетот на живот на децата и нивните родители, потенцираше министерот.
Градоначалникот Митровски посочи дека изминатите години се направени бројни напори за зголемување на капацитетот, отворени се 3 нови градинки во општина Ѓорче Петров и со тоа е зголемен бројот на згрижени деца за да можат родителите да си ги вршат своите обврски.
За еден месец ќе се започне и со изградба со нова градинка во месната заедница „Мирче Ацев“ за уште 50 дечиња.