Ниту еден од македонските универзитети не се најде меѓу 2.000 најдобри универзитети во светот, покажува листата Глобал 2000 објавена од Центарот за рангирање на светски универзитети.
Од регионот најдобро пласиран е Универзитетот во Белград – на 393 место, додека Универзитетот во Љубљана е на 444, а Универзитетот во Загреб на 522. место.
Исто така, уште три други универзитети од Србија се најдоа на оваа листа – Универзитетот во Нови Сад, кој е рангиран на 1.136-то место, Универзитетот во Крагуевац на 1.549-то место, како и Универзитетот во Ниш на 1.886-то место меѓу најуспешните во светот.
Од Хрватска, покрај загрпскиот, на листата се најдоа и Универзитетот во Сплит (953) и Универзитетот во Риека (1.658).
Од Словенија на листата е и Универзитетот во Марибор – на 1.293. место.
Топ 10 рангирани универзитети во светот оваа година се: Харвард, МИТ, Стенфорд, Кембриџ, Оксфорд, Принстон, Универзитетот во Пенсилванија, Колумбија, Јеил и Универзитетот во Чикаго.
Центарот ги оценува универзитетите врз основа на четири критериуми, без да се потпира на анкети или податоци обезбедени од самите универзитети: квалитет на образование (25 проценти), вработливост на дипломираните студенти (25 проценти), квалитет на наставниот кадар (10 проценти) и истражувачка работа (40 проценти).
