Нема загрозени Македонци ниту пак некои што се во опасност на Халкидики по силното невреме што го зафати вчера регионот – потврдуваат за Канал 5 од македонскиот конзулат во Солун.
На дежурниот телефон што вчера експресно беше отворен за сите наши туристи во Грција, за да побараат помош доколку имаат потреба и доколку се во опасност од невремето, се јавиле околу 10ина македонски државјани. Дел од нив за да побараат информации за тоа каква е состојбата на Халкидики, за да прашаат дали е се во ред со нивните деца или роднини кои летуваат на краците во Грција, а други пак барале совет што да прават со нивните поплавени автомобили.
Денеска, времето се нормализира и нема најави за нова бура или поројни дождови. Општината нема никаква одговорност, не бевме известени за толку силно невреме, сега ситуацијата е добра, туристите може да се вратат во Ситониа – вели градоначалникот на Ситониа, туристичкото место на вториот крак на Халкидики, кое вчера беше едно од најпогодените места од силното невреме, но и место каде што летуваат голем број македонски туристи.
„Многу луѓе си заминаа од Ситониа, но денеска ситуацијата е добра и ги повикуваме да се вратат." вели Јанис Ѕиѕиос, градоначалникот на Ситониа, за грчкото радио Алфа 96.5. Тој додава дека секое лето во Ситониа доаѓаат околу 300 илјади туристи, а општината веќе упатила барање да се прогласи вонредна состојба за побргу да се санира штетата.
Неофицијално, според информациите од Халкидики, голем број од туристите меѓу кои и Македонци, не си заминале, туку одморот го продолжиле во некоја од соседните туристички места, се додека не се подобри ситуцијата