Градоначалникот на Град Скопје, Орце Ѓорѓиевски, вчера ја одржа првата седница на Координативното тело на градоначалници, најавувајќи редовна меѓуопштинска координација (еднаш на 40 дена).
Тој изјави дека и покрај наследената лоша финансиска состојба и нефункционалноста на јавните претпријатија, состојбите се стабилизираат.
Следната недела ќе биде распишана тендерска постапка, а Скопје ќе има функционален Луна парк до јуни 2027 година.
- Еден проект што ми е посебно драг е Луна Паркот. Почнуваме постапка и конечно, после децении, нашите деца ќе добијат место за радост и игра. Нешто што ние и нашите генерации долго го очекувавме, порача градоначалникот на Скопје.
Процесот за воведување на БРТ системот е одблокиран по средбите со Владата и премиерот Мицкоски. Се очекува постапката за реализација да започне следната година. По интензивни средби во Брисел, не постои повеќе опасност Скопје да го изгуби овој статус.
