Скопјани ја поздравија одлуката на Град Скопје за целосна реконструкција на фонтаната „Лотос“, сместена на влезот од Градскиот парк, место што со децении претставува препознатлив белег и гордост на Скопје, но и место кое долги години беше запуштено.
Вака изгледаше некогаш фонтаната „Лотос“ на влезот на Градскиот парк во Скопје - култното собирно место и за помладите и за постарите граѓани.
Градски парк кој го знаеме денес е направен во 1970 година, кога е завршен насипот на Вардар, а како круна на паркот во 1971 година пуштена е во употреба фонтаната „Лотос“.
На местото на фонтаната пред нејзината изградба имало мочуриште, полно со убави бели цветови. И токму оттаму потекнува инспирацијата за проектантот, лотосовиот цвет. Фонтаната „Лотос“ е дело на архитектката Мирјана Милановиќ-Волињец (1938-1982), која работела во Заводот за урбанизам и архитектура Скопје.
Фотографијата е направена во почетокот на 80-тите години и несомнено буди убави спомени кај старите скопјани.
