Општина Илинден продолжува со реализација на капиталниот проект за изградба на домови на културата во сите 12 населени места на територијата на општината.
Последно, изграден е нов Дом на културата во населеното место Миладиновци кој е со површина од 360 метри квадратни. Со тоа се создадоа услови за непречено функционирање на граѓанските здруженија, одржување на културни настани, предавања, работилници, трибини, конференции и слично.
Свои простории во новоотворениот Дом на културата кој го носи името „Браќа Миладиновци“, добија локалната месна заедница, Здружението на граѓани и лица со хендикеп „Илинден“, но и членовите на пензионерскиот клуб „Миладиновци“. Покрај Домот на културата, општината им обезбеди и простории со вкупна површина од 120 квадратни метри за пензионерите од Здружението на пензионери од Општина Илинден кое брои близу 2 000 членови. Истите простории ќе ги користи и локалниот клуб на пензионери од населба Илинден.
На територијата на општината во моментов функционираат 5 пензионерски клубови и тоа Илинден, Марино, Кадино, Бујковци и Миладиновци. Проектот е во насока создавање подобри услови за сите жители на Општината.