Откога е во примена Законот за високото образование од 2018 година, нашите универзитети ги нема на меѓународните ранг-листи. Професорите бараат и имаат повисоки плати, а не пишуваат ниту еден научен труд во годината. Така повеќе не може да биде, порача вчера премиерот Христијан Мицкоски.
Одговарајќи на новинарски прашања, тој рече дека „импровизираат и манипулираат сите оние политички шпекуланти кои велат дека со законот за високото образование се нарушувала автономијата на универзитетите“.
„Тие во суштина се плашат од новите критериуми за избор во звање. На состанокот што вчера го организира МОН во Владата, ректорите на државните универзитети, буквално сите, дадоа поддршка на законот“, изјави Мицкоски по поставувањето камен-темелник за доградба на ООУ „Страшо Пинџур“ во Ѓорче Петров.
Како што рече, на Шангајската листа паднал за 1.000 места во рангирањето, а може воопшто повеќе и го нема, рече тој, најстариот и најреномиран наш универзитет „Свети Кирил и Методиј“.
„А едно време беше рангиран. Е, сега, тие сакаат да работат еден ден во неделата, сакаат плата од 120.000 до 150.000 денари, а не сакаат ниеден труд да напишат годишно, а тоа им е работа. Еден труд. Тоа е исто како јас како претседател на Владата да доаѓам на работа половина ден во неделата и да барам да имам 10 пати повисоки примања и да не одговарам за ништо во државата. Тоа не оди така. Оваа Влада им ги покачи платите на универзитетските работници двојно како резултат на колективниот договор. Суштината е таа. Не сакаат да работат. Сакаат да имаат шест часа неделно, да ги затворат во еден ден, сакаат 120.000, 130.000, 150.000 денари плата и ниеден научен труд да не напишат. Тоа повеќе не може да биде“, изјави Мицкоски.
Како што рече, покрај предавањата и соработката во проекти, имаат обврска да пишуваат и научни трудови и дека државата веќе им обезбеди бесплатен пристап во светските научни бази.
