За православните христијани денеска започнува Петровденскиот или Апостолскиот пост, еден од четирите повеќедневни пости во православната традиција, посветен на светите апостоли Петар и Павле.
Постот завршува на 12 јули, кога се празнува големиот христијански празник Петровден. За разлика од Божиќниот и Велигденскиот пост, неговиот почеток не е секогаш на ист датум. Тој започнува во понеделникот по празникот Сите Светии, кој се одбележува една недела по Духовден, па затоа неговото времетраење се менува секоја година во зависност од датумот на Велигден.
Светите апостоли биле толку различни: Петар, постариот брат на Андреј Првоповикан, бил прост, необразован, сиромав рибар; Павле – син на богати и познати родители, римски граѓанин, ученик на познатиот јудејски учител по Законот Гамалиил, „книжник и фарисеј“. Петар – верен ученик Христов уште од самиот почеток, сведок на сите настани на неговиот живот од моментот на излегувањето на проповед. Павле – најголем непријател Христов, кој ја распалувал во себе омразата кон христијаните и испросил од синедрионот дозвола да ги гони христијаните насекаде и да ги приведува во Ерусалим врзани. Петар, маловерен, кој трипати се одрекол од Христа, но скрушено се покајал и станал начало на Православието, основа на Црквата. И Павле, јаросен противник на правдата Божја, а потоа, исто толку пламенит верник.
Според учењето на Православната црква, суштината на постот не е само во воздржувањето од одредени видови храна, туку пред сè во духовното усовршување, покајанието, молитвата и правењето добри дела.
Верниците во текот на постот се повикуваат на почеста молитва, учество на богослужби, читање духовна литература, помирување со ближните и помагање на луѓето во неволја. Црквата учи дека вистинскиот пост подразбира и воздржување од лоши навики, гнев, осудување и други постапки кои го оддалечуваат човекот од духовниот живот.
Петровденскиот пост се смета за поблаг во споредба со Велигденскиот. Вообичаено, во понеделник, среда и петок се пости без масло, додека во вторник и четврток е дозволено масло. Во сабота и недела, како и на одредени празници, се дозволува и риба, согласно црковните правила и благословот од духовникот.
Овој пост е востановен во чест на светите апостоли Петар и Павле, кои според црковното предание пред својата мисионерска дејност постеле и се молеле. Затоа и денес верниците го следат нивниот пример, подготвувајќи се духовно за празникот посветен на двајцата големи апостоли.
Црквата потсетува дека вистинската вредност на постот не се состои само во ограничувањата во исхраната, туку во промената на срцето, зајакнувањето на верата и приближувањето кон Бога. За православните христијани, Петровденскиот пост претставува време на духовно обновување, смирение и подготовка за еден од најзначајните летни празници во православниот календар.
