Ланчиња, игли, трева… Што се извадиле лекарите од детските организми во болницата во Козле!?

Дванаесет месечно бебе  од Скопје почнало нормално да дише откако од белите дробови му извадиле ланче. Во детската болница во Козле завршило во лоша здравствена состојба и веднаш интервенирал тимот за бронхоскопија. Интервенцијата била успешна, а здравствените работници биле во шок како успеало да вдише накит долг 15 см.

Ова е само дел од палетата на предмети извадени од дишните патишта кај деца. Лекарите од оваа установа биле присутни и на драматични ситуации кога секунди биле во прашање за спасување на детски живот, пишува Здравство24. 

-Има многу случаи, не може некој посебно да се издвои…Имаме 6 месечно бебе кое голтнало трева, детенце кое стигна кај нас со дел од тракторска гума, девојче кое голтнало шпенагла, каменчиња, и многу други туѓи тела кои ги имаме најдено во дишни патишта, вели д-р Јане Бужаров од тимот за бронхоскопија во болницата во Козле

Долготрајна и сува кашлица или проблеми со дишењето се најчестите симптоми  кога лекарите од Козле преку бронхоскопија откриваат туѓо тело во белите дробови. Дали состојбата е алармантна, велат дека зависи од местоположбата на вдишаното камче или зрно грав.

-Може да трае и една минута а може и 30 минути, но тоа е максимум колку се изведува бронхоскопија кај деца. Гледајќи ја возраста, имаме од 6 месечни бебиња до тригодишни деца, вели др Бужаров.

Во нивната пракса имале и случаи кога вакви туѓи тела со години биле присутни во дишните патишта кај децата. Во таквите случаи можат да останат и доживотни компликации по здравјето.

Лекарите со апел до родителите да бидат постојано во близина на нивните деца бидејќи и мало невнимание може да заврши трагично. Во некои развиени земји постои пракса кога има вакви случаи, од болниците повикуваат социјални служби да разговараат со семејството.