Чаршијата во Скопје секогаш буди убави спомени.
Синоним за златарници и за слаткарници, за јоргани и за ќебиња, за убав накит од филигран, за конци и за волна за плетење, за кломпи и за опинци, кои во едно време беа многу модерни да се носат по Скопје, за крзна од лисици, кои нашите мајки ги носеа околу вратот и за бунди на кои беа горди дека се од чаршијата, а не купени од некое летување кај јужниот сосед. Материјали за шиење, басми, жерсе, жоржет… Кај ќе најдеш срма, ламе, кадифе, штрас, ако не во чаршијата? Ако нема во дуќанот каде што најчесто одиш, таму ќе ти помогнат и ќе те упатат на вистинското место.
Ефтините кинески производи, но и напредокот на технологијата ги убиваат старите заенаети, се жалат неколкуте преостанати занаетчии во Старата скопска чаршија. Од стотината калајџии, алваџии, бозаџии, јорганџии, казанџии, кујунџии, папуџии и ковачи денеска само уште неколкумина, претежно повозрасни луѓе ги одржуваат занаетчиските дуќани во чаршијата.
Биљал Абдуловски е роден во Гази Баба во 1959 година. Тој завршил средно образование - Тексилно во Димитар Влахов. Тој уште на негови 10 години како чирак почнува да се интересира за овој занает.
Кројачкиот Салон Гази Баба датира уште од 1979 година. Дуќанот го наследиле со неговиот брат од татко му на Бранко Гапо, кој исто така бил шнајдер.
Порано било сон да се биде шнајдер, вели тој, за разлика од денес кога повеќе работат како сервис отколку што произведуваат. Досега изработувал најразлични Македонски и Албански носии. Во 2014 година изработил пантолони и комплет за Галичка свадба.