Криза, војна и корона: Ќе поскапат ли патувањата?

Лоши вести не недостигаат - сѐ уште не завршила пандемијата, а среде Европа почна војна. Многумина во овие времиња копнеат по одмор. Но, дали и во туризмот се заканува криза?

St. Martin I Niederlaendische Antillen

Повеќе од две години пандемија на корона - време кое остави свој белег на многумина. За некого тоа беше време на живот и смрт. Многумина се соочија со егзистенцијални стравови и не знаеја дали последиците од пандемијата може да ги чинат работа. А потоа, во февруари 2022 година, почна руската војна против Украина.

Затоа, не е ни чудно што многумина сакаат одмор од кризата, војната и короната. Само да се замине на одмор, човек да може да се исклучи, да се опушти и опорави. Добро е ако се успее во тоа. Лошо е ако не се успее. Затоа што кризите имаат влијание и врз туристичката индустрија.

Сѐ поскапува! И летовите и хотелите?

Оние кои во моментов разгледуваат летови, честопати се прашуваат: зарем порано не беше поевтино? Честопати беше така. За поскапувањата, меѓу другото, има две причини. Првата е: „

„Генерално, трошоците за керозин растат, а и цената на нафтата е сè уште на рекордно ниво. Тоа гостите го чувствуваат и кога станува збор за цените на авионските билети, кои стануваат поскапи“, вели за ДВ Јохана Тилман од германската авиокомпанија Кондор. Не плаќаат повеќе само возачите на бензинските пумпи, туку и авиокомпаниите плаќаат повеќе за керозин.

Symbolbild | Betanken von Passagierflugzeugen

Поскапувањето на керозинот вообичаено носи и повисоки цени на авиобилетите

„Без оглед на ова, моментално има голема потреба за одмор. Ова има влијание врз цените на билетите за летови и за сместувањето, особено за време на распустите, бидејќи тие се засноваат на побарувачката“, објаснува Јохана Тилман.

Хотелите исто така се борат со повисоки трошоци. И тие треба да платат повеќе за нафта, гас, струја и храна. Има и проблем со недостиг од квалификувани работници. Во екот на пандемијата, хотелите беа празни, а многу вработени побараа друга работа. Во некои случаи, хотелите дури мора да се служат со стимулации за да регрутираат вработени - главно се тоа финансиски стимулации. И овие дополнителни трошоци делумно се пренесуваат на гостите во вид на повисоки цени на собите.

Hamburg - Hotel - Foyer im Hotel Reichshof

Во хотелите недостига работна сила

Што е со паушалните патувања?

Кога станува збор за паушални патувања, се резервира цел пакет, кој се состои од лет, хотел и трансфер до хотелот. Според германскиот портал за споредба и резервации Check24, паушалните патувања резервирани преку овој портал до главните места за одмор на Германците станале исто така поскапи од претходната година.

Просечното еднонеделно паушално патување на две лица во Мајорка, кое било резервирано во мај за периодот јуни-август, поскапело за 17% во споредба со претходната година, се вели од порталот. „И покрај ниското ниво на цените на турската ривиера, поскапувањето е најзабележливо во Сиде и Аланија. Таму, една недела одмор за двајца летово чини 45% повеќе отколку минатото лето“, вели за ДВ Мартин Циер, директор на одделот за паушални патувања во Check24.

Поскапи патувања

Меѓутоа, од тоа не може да се заклучи дека секое од патувањата е поскапено исто, зашто за цената во игра се многу фактори. Па, така, Германците, според Германскиот туристички сојуз (ДРВ), по две години неможност да патуваат, во моментов едноставно трошат повеќе пари само затоа што резервираат патувања со повисок квалитет. „Оние кои порано резервираа само со појадок, сега резервираат 'Аll Inclusive'‚ оние кои порано резервираа хотели со три ѕвезди, сега резервираат хотел со четири ѕвезди. И, многу туристи патуваат подолго од вообичаеното“, објаснува Торстен Шефер, портпарол на ДРВ.

Turkei Swimmingpool

Туристите во моментов трошат повеќе пари, затоа што резервираат патувања со повисок квалитет

Слични се и набљудувањата на Луфтханза. „Моментално е тешко да се добијат места во бизнис и прва класа. Тие се првите кои се целосно резервирани кај нас“, вели портпаролката на Луфтханза, Бетина Ритбергер. Многумина не биле на одмор две години, заштедиле пари и сега сакаат добро да се забавуваат, додава таа. Според ДРВ, генерално летово има голема побарувачка за летови до Средоземјето, особено Шпанија, Грција и Турција.

Торстен Шефер смета дека цените на паушалните патувања се генерално стабилни, затоа што туристичките компании ги имаат купено контингентите кај хотелите и авиокомпаниите навреме, по поволни услови, повеќето уште во текот на претходната година. Оној кој резервира рано, патува по поволни цени. Меѓутоа, ако се случи контингентите да бидат распродадени и туристичките компании да мора да купуваат дополнителни контингенти, тогаш тоа може да биде поскапо.

Дополнителни трошоци

Оној кој резервира патување, во пресметката треба да ги вклучи и дополнителните трошоци. Можно е многу ресторани, клубови и кафулиња на дестинацијата за одмор да ги зголемиле своите цени. И да не заборавиме: автомобилите за изнајмување. Автомобилите за изнајмување резервирани на порталот Check24, во преткризната 2019 година чинеле во просек нешто повеќе од 34 евра дневно во сите 20 земји вклучени на порталот за споредба, а оваа година чинат речиси 74 евра.

А, покрај финансиите, има и други работи кои моментално можат да го отежнат одморот. Слично на хотелската индустрија, на многу аеродроми недостасуваат квалификувани работници. Резултатот се неизмерно долги редици пред безбедносните контролни пунктови. Ситуацијата на аеродромот Шипхол, во Амстердам, е екстремна. Патниците понекогаш мораа да чекаат со часови додека поминат на контрола. За да спречи ситуацијата да стане уште подраматична, авиокомпанијата КЛМ драстично ја намали продажбата на билети за летови од Амстердам.

Niederlande I Flughafen Schiphol

Стрес пред одмор - редици на аеродромот Шипхол во Амстердам

Накратко: ако планирате одмор, тоа треба да го направите рано, да не чекате поволни понуди до последна минута, да не се чудите ако патувањето е поскапо од минатата година и однапред да размислите за можните проблеми. Тогаш има добри шанси навистина да се одморите од кризи, војна и корона - барем за извесно време. Затоа што летот за враќање дефинитивно ќе дојде.

Извор: Дојче Веле