Концертот на легендарниот трип-хоп бенд Масив Атак, што синоќа се одржа во Скопје, беше еден од најочекуваните настани ова лето, но дел од публиката на социјалните мрежи изрази разочараност од организацијата, посочувајќи неколку сериозни недостатоци.
Најмногу критики се однесуваат на значителното доцнење на настапот. Иако на билетите беше наведено дека концертот започнува во 19:00 часот, настапот не започна ни до 21:15 часот, при што публиката стоеше повеќе од два часа на топло време. „Shame on you Avalon“, стои во твитот кој собра најмногу лајкови на платформата „X“.
Всушност многу е тапа да ставиш дека концерт/влез е од 19:00 за да испадне дека решиле без да кажат да биде од 20:00 и на крај во 21:15 уште ништо да не е почнато а луѓе стојат два ипол саати… shame on you Avalon.
— Natasha (@Boychenn) June 28, 2025
Други коментари посочуваат дека доцнењата стануваат практика на концертите организирани од „Авалон продукција“, иако има разбирање дека високите температури можеби се причината за доцнењето, евентуално на барање на изведувачите.
Авалон уште еднаш потврдија дека за организација заостанати се некаде во крајот на 80тите во минатиот век. Шанкови, ко у Градиште ‘87ма, без терминали, само кеш, огромни редици, нефункционални. Масив Атак солидни, ништо спектакуларно.
— Ilina Angel (@ilinaangel) June 29, 2025
Покрај доцнењето, дел од посетителите го критикуваа и недостигот на основни безбедносни контроли и лошата организација на продажбата на пијалаци. „Плаќање само во кеш, кое никаде не беше најавено, и чаши кои личеа на садови за урина“, се наведува во еден од коментарите.
Впечатоци од концертот во СК vs настапот на InMusic: Не знаеме да организираме настани.
Од аспект на безбедност, никој не ме провери што носам во чанта.
Шанк: Плаќање само во кеш, кое никаде не беше најавено, служење пијачки во чаши за мокрача, од страна на луѓе кои ми личеше 1/4— BB (@Beelyana) June 29, 2025
Сепак, замерки имаше и на сметка на самиот бенд, особено поради нивните политички пораки што беа дел од визуелната поставка на концертот. „Многу ми е смешно што пола Скопје што не отишло подалеку од кафана во Врање, отишле на Масив Атак и се чудат зошто имале политички пораки“, напиша еден корисник на социјалните мрежи, потсетувајќи дека политичкиот ангажман отсекогаш бил дел од идентитетот на Масив Атак.
