Kомуналните инспектори на Општина Аеродром од утре ќе работат во две смени. Тие ќе бидат достапни секој ден од 8:30 до 22:30 часот, вклучувајќи ги и викендите, на телефонскиот број 075 316 515.
За потребите на оваа акција ќе биде ангажирана целата инспекциска служба, кој се состои од 8 комунални инспектори и 4 комунални редари, наведуваат од Општина Аеродром.
„Оваа одлука е со цел успешна реализација на проектот „Пријави загадувач“, која е дел од заложбите на локалната самоуправа за почист воздух. По барање на граѓаните и препознавајќи ја потребата за поголема ефикасност на инспекциските служби, Општина Аеродром смета дека е неопходно да се воведе дежурна смена на инспекторите“, велат од Општината.
Целта на акцијата „Пријави загадувач“, како што наведуваат, е што побрзо да се детектираат и соодветно да се регулираат загадувачите на територијата на Општина Аеродром. Во рамките на истата Општината организира редовни акции за мерење на квалитетот на амбиенталниот воздух и контрола на стационарните извори на територијата на општината.
Од Општина Аеродром велат дека ги охрабруваат граѓаните да земат активно учество и редовно да ги пријавуваат загадувачи до општинските инспекциски служби.
