Јавното претпријатие „Паркинзи на Општина Центар“ (ПОЦ) се подготвува за воведување наплаќање за паркирањето во реонот на Градскиот парк.
Kако што информираат од претпријатието во моментот се поставува сообраќајна сигнализација и се работи на информирање на сите засегнати страни околу начинот на функционирање на јавното паркиралиште кај паркот.
- Се реализираат состаноци со жителите на Центар и деловните субјекти што функционираат таму, со цел да бидат запознаени со новите правила и начинот на паркирање и наплата - потенцираат од ПОЦ, без да прецизираат кога официјално ќе почне да функционира паркингот.
Од ПОЦ објаснуваат дека паркиралиштето ќе биде од отворен тип и плаќањето ќе се врши преку СМС-порака. Цената за користење за 1 час паркинг ќе биде 50 денари. Kако и другите отворени паркиралишта на ПОЦ, паркингот ќе биде бесплатен за сите жители на Центар.
Паркиралиштето ќе работи секој работен ден од 8 до 22 часот и в сабота од 8 до 15 часот. Во неделите и државните празници паркиралиштата се бесплатни за сите граѓани.