Во пресрет на најавената посета на бугарскиот премиер Кирил Петков и средбата со македонскиот премиер, Димитар Ковачевски, попладнево со писмо до јавноста се огласи Претседателот на Македонско – Бугарска стопанска комора, Кирил Лазаров.
Преку ова отворено писмо тој вели дека сака од негово лично име како претседател на македонско-бугарската стопанска комора и од име на сите оние кои партиципираат во неа, да го изрази задоволството од најавената средба која има можност да биде и историска ако двете страни имаат поглед кон иднината.
- Ја имате почитта и поддршката од целата комора да пристапите кон суштинските проблеми кои ги тиштат двете општества и да најдете решенија кои на двата народа ќе донесат прогрес, иднина, работни места, економија и поврзување. Имате историска должност кон сите оние кои живеат денес и ќе продолжат да живеат и утре, или после 10, 30 или 50 години, затоа што денес ја пишувате иднината и новата историја, историја во која ќе пишува дека Вие двајцата лидери сте нашле решение во кое ќе има нови автопати, нови гранични премини, во кое ќе профункционира железничката трансверзала, ќе имаме директен лет Скопје-Софија, и решение во кое ќе дефинирате иднина во која ќе се разговара колку многу наши драги соседи од Бугарија ќе дојдат во Охрид или Маврово, а колку Македонци ќе отидат во Банско или Сончев Брег. Создадете иднина за која ќе се зборува со силни емоции, со среќа и љубов за двата народа, за благосостојба на нашите деца. Создадете енергија за нашите народи да се почитуваат, поздравуваат и да се прегрнуваат каде и да се сретнат. Нели сме братски народи со заедничко минато и уште позаедничка иднина? Да зборуваме за гасоводи, автопати, ветерници, хидроцентрални, фотоволтаици, да ги споиме нашите народи во земјоделието, туризмот, одбраната и образованието, вели Лазаров во писмото.
Лазаров ги повикува двата премиери да го посеат семето на пријателството наместо на омразата затоа што тоа им го должиме на нашите деца и поколенија.
Апелира да се запре миграцискиот пустош кој ни се случува во двете држави и повикува на договор кој ќе не натера да остане ме тука и да живееме едни покрај други во хармонија, наместо некаде далеку да бидеме Mакедонци и Бугари во Македонија и Бугарија, наместо странци во Англија и Германија.
- Нашите економии и трговска размена имаат огромен потенцијал за да нашиот капитал и работници останат тука. Се друго е ризик за нашите држави бидејќи живееме во најтурбулентните времиња кои носат многу неизвесности и опасности изразени преку наголемата енергетска, пандемиска и економска криза. Вие доаѓате од бизнисот, исто и јас, знаеме што е бирократија, корупција, блокади, пречки и знаете што треба да направите за да го елиминирате сето тоа.Во светло на денешната средба и заедничката иднина ја имате целокупната нашата поддршка. Ве чека многу работа, но иста цел! Направете чекори кои ќе не зближат, а ние како народи ќе знаеме да го почитуваме тоа, додава тој во писмото.
- Бидете оние кои ќе ја напишат новата економска историја и за кои ќе се зборува многу долго од денес па натаму, завршува Лазаров.
