Каролина заедно со Македонската филхармонија во деновите на љубовта во живо во Скопје!

Големо задоволство ни е да ви го најавиме нашиот следен проект за 2019 година – нашата најголема музичка ѕвезда, Каролина Гочева, за прв пат во својата кариера ќе се претстави во живо на концерт, заедно со комплетниот состав на Македонската филхармонија – објавија од „Авалон продукција“.

Концертите се закажани во деновите на љубовта, на 15 и 16 февруари и ќе биде навистина огромно задоволство да се слушнат песните од проектот „Македонско девојче“, „Извор“ и некои од најубавите песни од претходните албуми на Каролина во живо, во комплетно нови аранжмани.

Новата сала на Македонската филхармонија како убедливо најдобра сала од тој тип во Европа во моментов, овозможува 100 отсто услови за неверојатно квалитетен музички производ каков што сме сигурни дека ќе добиеме од Каролина и сите музичари во вечерите на 15 и 16 февруари.

Влезниците во максимално ограничен број по цена од 1.000 денари, ќе бидат пуштени во продажба од среда (28.11) во 09 часот наутро онлајн на avalon.mk и продажната мрежа на Авалон, и ако се земе во предвид што се случуваше со последните концерти на Каролина во МОБ, се разбира дека треба да побрзате.