Летото е период кога многумина се препуштаат на уживање под сонце, долги прошетки, излети и чести дружби, кои често подразбираат и чаша ладен алкохолен пијалак.
Photo by Markus Spiske
Без разлика дали станува збор за пиво на плажа, коктел на тераса или чаша вино на летна вечера, алкохолот делува поинаку врз телото кога надворешната температура е висока. Но, она што многумина не го знаат е дека комбинацијата од жештина и алкохол може да има многу посериозни последици отколку во други периоди од годината.
Една од најголемите опасности при пиење алкохол во лето е дехидрацијата. Алкохолот има диуретично дејство, го поттикнува телото да излачува повеќе течности преку урината. Во комбинација со топлината и потењето, ризикот од дехидрација се зголемува драстично. Истражувањата покажуваат дека пиењето две до три алкохолни пијалаци во жешок ден може да го намали нивото на хидрација на телото и до 20%, што доведува до замор, вртоглавица и намалена способност за концентрација.
Дополнително, алкохолот ја нарушува терморегулацијата на телото. Кога пиеме алкохол, крвните садови се шират (вазодилатација), што создава лажен впечаток на топлина и го отежнува природниот процес на ладење преку потење. Ова е особено опасно за луѓе со срцеви заболувања, високи нивоа на стрес или за оние кои вежбаат на отворено. Според податоци од Центарот за контрола на болести во САД (CDC), комбинирањето физичка активност, жештина и алкохол е меѓу водечките причини за топлотен удар во летните месеци.
Photo by Engin Akyurt
Алкохолот исто така влијае и на нашата кожа и изложеноста на сонце. Истражувањата објавени во „British Journal of Dermatology“ покажуваат дека луѓето кои консумираат алкохол редовно се изложени на поголем ризик од изгореници и оштетување на кожата од UV зрачење. Алкохолот ја намалува способноста на телото да се заштити од сонцето, делумно поради намалување на антиоксидантната одбрана, но и поради намалената перцепција за тоа колку време сме поминале изложени на сонце.
Од психолошки аспект, алкохолот може да предизвика нарушување на расположението, зголемена анксиозност и нарушен сон. Во лето, кога ионака спиеме пократко поради високите температури и долгите денови, алкохолот дополнително го намалува квалитетот на спиењето. Наместо да не опушти, честото пиење може да резултира со утринска раздразнетост, ниска енергија и намалена мотивација – што се коси со идејата за „летен одмор и полнење батерии“.
Препораките се едноставни, но важни: секогаш пијте вода паралелно со алкохол (на пример, една чаша вода по секоја чаша алкохол), избегнувајте пиење во најтоплите делови од денот (11 до 16 часот), не комбинирајте алкохол со физичка активност на жешко време и секогаш имајте храна кога пиете. Ако веќе сакате да уживате во летен коктел, најдобро е да го правите тоа навечер, по зајдисонце, во умерени количини. Летото е тука да нè освежи и опушти, а не да нè исцрпи. Од нас зависи како ќе го искористиме.
