По првпат откако функциниора системот „Безбеден град“, во текот на завчерашниот ден не бил регистриран ниту еден прекршок за минување на затворен семафор - црвено светло.
Ова го соопштија од полицијата, а информацијата веднаш беше протолкувана на социјалните мрежи. Многумина кои го поддржуваат проектот „Сејф Сити“ велат дека ова се конкретните резултати на терен.
Младиот активист и писател Мартин Јовановски го сподели својот став на темава, во прилог на зголемената безбедност:
- Од системот „Безбеден град“ регистрирани се вкупно 526 прекршоци, првпат не е регистриран ниту еден за минување на црвено светло... Вчера можеби е спасен еден живот, можеби и два, три, пет...а можеби и никој не е спасен, можеби и ништо не е сменето со ограничувањата и камерите. Којзнае, реално никој не може да тврди ништо со сигурност, вели тој.
- Меѓутоа, кога во еден милионски град, во 24 часа нема да биде евидентирано ниту едно поминување на црвено светло, евидентно е дека дури и кај овој народ може да се воспостават правила и истиот да биде дисциплиран и одговорен. Со податокот од погоре само се потврдува дека НИШТО ОСВЕН ФИНАНСИСКА ПОСЛЕДИЦА И ЗАБРАНА ЗА УПРАВУВАЊЕ ВОЗИЛО ОДНОСНО ЗАКАНА ЗА ЕФЕКТИВНО НАРУШУВАЊЕ НА КОМОДИТЕТОТ НЕ МОЖЕ ДА ДОНЕСЕ РЕД, ПОЧИТ, ВНИМАНИЕ, БЕЗБЕДНОСТ И ДИСЦИПЛИНА НА УЛИЦИТЕ.
Во недостаток на созреаност, свесност и воспитување, ништо освен камшикот не носи ефект. И ова е факт. Суров, очигледен, неспорен, наведува тој во својата фејсбук објава.
