Иванов: Спроведување итни мерки за заштита на животната средина и здравјето на луѓето

Контролните механизми на државата, во согласност со Просторниот план на Република Македонија 2004-2020, да спроведат итни и строги мерки за заштита на животната средина и здравјето на луѓето, побара претседателот Ѓорге Иванов, во годишното обраќање во Собранието на Република Македонија, во однос на барањето на граѓаните за стопирање на изградбата на рудниците Казандол, Иловица и Боров Дол.

- Југоисточна Република Македонија е на нозе. Моите сограѓани од мојот роден крај бараат стопирање на изградбата на рудниците Казандол, Иловица, Боров Дол... Тие се повикуваат на фундаменталното човеково право на здрава животна средина. Нивното барање е и мое барање, рече претседателот Иванов.

Користењето на штетни хемиски методи за експлоатација на природното богатство, истакна македонскиот претседател, влијае негативно на животната средина. Очекувам економскиот развој да биде во согласност со принципите на одржливиот развој, додаде тој.

Македонскиот претседател рече дека со голема загриженост ја следи и дебатата за ризикот од еколошка криза.

- Нашите градови се гушат поради загадениот воздух. Надлежните институции на локално ниво, особено Град Скопје, имаат законска обврска да најдат одржливи решенија за овој сериозен проблем, порача Иванов.