И годинава доцнат вакцините против сезонски грип

И оваа година вакцинацијата против сезонски грип доцни. Во одговор за порталот Фактор, една недела пред истекот на октомври, од Министерството за здравство соопштија дека набавката е во тек и дека се очекува да има 40.000 дози вакцини против сезонскиот грип. Освен тоа, како што посочуваат, пристигнувањето на вакцините зависи од производителите. 

Во меѓувреме, додека се уште се чекаат вакцините против грип, здравствените власти апелираат на што поголем опфат на вакцинација против корона вирусот. Епидемиолозите велат дека, дури и да се случи истовремена вакцинација, и против ковид и против сезонски грип, нема да се случат несакани ефекти од двете вакцини истовремено. Напротив, придобивките од вакцинацијата се многу поголеми, особено, доколку едно лице истовремено се зарази и со ковид и со сезонски грип.  

Инаку, лицата кои бесплатно ја примаат вакцината против сезонската инфлуенца, односно грипот, според Комисијата за заразни болести се оние кои припаѓаат на некоја од ризичните групи.

- Стари лица (над 65 години)

- Лица со хронични заболувања

- Здравствени работници

- Бремени жени

- Децата на возраст од 6 месеци до 5 години 

Минатата година, комерцијалната вакцина против сезонски грип чинеше 600, а здравствените власти очекуваат оваа цена да остане иста.