Хуманитарна акција за собирање училишен прибор за деца од најранливите категории се реализираше во општина Гази Баба, на покана на Унијата на млади сили на ВМРО-ДПМНЕ при Општинскиот комитет Гази Баба.
Во акцијата се приклучи и градоначалникот на Општина Гази Баба, Бобан Стефковски, кој ја истакна важноста од поддршката за децата и семејствата на кои им е најпотребна.
Акцијата има и симболично значење бидејќи се одржа вчера, на денот на раѓањето на Мајка Тереза, која е препознатлива како симбол на хуманоста, милосрдието и помошта кон оние на кои им е потребна.
Од иницијативата посочуваат дека целта не е само да се обезбеди училишен прибор, туку на децата да им се овозможи еднаков и достоинствен почеток на учебната година.
Стефковски упати признание до младите за иницијативата и општествената одговорност, нагласувајќи дека секоја подадена рака може да донесе надеж и да направи разлика во животот на едно дете.
- Хуманоста е најголемата лекција што можеме да ја пренесеме, порача првиот човек на Гази Баба.
