Во свет полн со брзина, вознемиреност и постојани барања, често забораваме дека телото има природни начини да се смири и заздрави.
Photo by Megan Thomas on Unsplash
Нашиот нервен систем е како централна жица што го пренесува секое чувство, мисла и реакција, а храната што ја внесуваме има директно влијание врз тоа како се чувствуваме. Понекогаш мислиме дека анксиозноста или раздразливоста се само „во главата“, но вистината е дека хранливите материи што ги внесуваме можат да бидат најмоќниот лек – или пак најголемиот непријател – на нашата смиреност.
Магнезиумот е често наречен „минерал на смиреноста“.
Photo by CHUTTERSNAP on Unsplash
Го има во семките од тиква, сончоглед, бадемите, па дури и во темното чоколадо. Тој минерал учествува во регулирањето на нервните импулси и му помага на телото да ја намали напнатоста. Многумина забележуваат дека во периоди на стрес им се појавува желба за чоколадо, не е тоа случајност, туку на телото му е потребно повеќе магнезиум. Додавањето едноставни извори на магнезиум во секојдневната исхрана е начин да му се даде на телото основата што му е потребна за да се врати во рамнотежа.
Омега-3 масните киселини, пак, се вистинска храна за мозокот.
Photo by Caroline Attwood on Unsplash
Најмногу ги има во рибата како лосос, скуша и сардини, но исто така и во лененото и чиа семето. Истражувањата покажуваат дека луѓето со доволен внес на омега-3 имаат пониско ниво на анксиозност и подобро расположение. Овие здрави масти ја хранат мембраната на мозочните клетки и помагаат за подобро пренесување на сигналите во нервниот систем. Тоа значи дека храната буквално може да влијае на тоа како ги чувствуваме мислите и емоциите.
Пробиотиците се уште еден скриен сојузник.
Photo by Daniel Cabriles on Unsplash
Сè повеќе научни трудови потврдуваат дека цревата и мозокот се поврзани преку т.н. „оска црева-мозок“. Јогуртот, кефирот, киселата зелка или кимчи не се само вкусна додавка на трпезата, туку и начин да се одржи здрава микробиота. Кога добрите бактерии во цревата се во рамнотежа, тоа се одразува и врз нашето расположение, со намалена раздразливост, подобар сон и повеќе енергија.
Не треба да се заборави и улогата на едноставните намирници како овошјето, зеленчукот и интегралните житарки.
Photo by Julia Zolotova on Unsplash
Тие обезбедуваат стабилен прилив на енергија и спречуваат нагли падови на шеќерот во крвта, кои често предизвикуваат немир, раздразливост и замор. Дури и чаша топол билен чај – камилица, маточина или лаванда – може да делува како природен сигнал до телото дека е време за одмор и смирување.
Секој од нас има своја приказна со храната, но кога ќе ја погледнеме како лек, тогаш се менува и односот што го имаме кон неа. Наместо да биде извор на вина или навика „на брзина“, храната може да стане наш сојузник во градењето на смиреност и стабилност. Со неколку свесни избори – рака полна семки, риба во чинијата неколку пати неделно, јогурт наутро – можеме да му дадеме на телото токму тоа што му е потребно за да се избори со немирот на секојдневието.
