Град Скопје не може да ја одземе мрежата на топлинско снабдување на Балкан Енерџи дооел, се вели во одлуката на Државниот ревизор. БЕГ во топловодната мрежа има инвестирано над 7 милиони евра од 2013 до 2019 година, а лиценцата им е со траење до 2047 година.
Ова го утврдиле од Државниот завод за ревизија во септември 2020 година, а се наведува во вчераобјавениот извештај за работењето на Акционерското друштво за стопанисување со станбен и деловен простор.
Овој спор настана кога Град Скопје ја запишал мрежата за парно-греење како своја сопственост, но Управниот суд ја уважил тужбата на операторот против Агенцијата за катастар на недвижнини, нагласува државниот ревизор.
– Преземањето на топловодната мрежа може да биде предлог на поведување на меѓународна судска постапка и арбитража од страна на БЕГ, кој располага со лиценца со важност до 2047 година, а врз основа на извршените вложувања во топлификационата дистрибутивна мрежа во градот Скопје во периодот од 2013 до 2019 година кои се проценуваат на околу 7,4 милиони евра – се вели во извештајот на ревизорите.
Државниот ревизор вели дека договорот кој го има операторот е во рамките на приватно облигационо право и дека не може да биде поништен со друга одлука.
