Синоќа на стадионот „Сан Сиро“ во Милано започна свечната церемонија на отворањето на 25-тите Зимски олимписки игри наречена „Хармонија“
На Олимписките игри во Милано и Кортина д’Ампецо, кои ќе траат до 22 февруари, ќе учествуваат 2.871 спортисти од 92 олимписки комитети.
За време на церемонијата, планирани се специјални музички изведби на американската пејачка Мараја Кери, како и италијанските уметници Лаура Паузини и Андреа Бочели.
На самиот крај од церемонијата, ќе бидат запалени два олимписки пламени – едниот ќе биде во Милано, во близина на Арко дела Паче, еден од најпрепознатливите симболи на градот, а другиот во Кортина д’Ампецо, на плоштадот Пјаца Дибона, центарот на познатиот планински град.
Спортистите ќе се натпреваруваат за медали во 116 натпревари во 16 дисциплини.
Ова ќе бидат третите Зимски олимписки игри и четвртите Олимписки игри што се одржуваат во Италија, додека Кортина д’Ампецо веќе беше домаќин на Зимските олимписки игри во 1956 година.
Овогодинешните ЗОИ ќе бидат први во историјата што официјално ќе бидат организирани во два града – Милано и Кортина д’Ампецо.
Милано ќе биде домаќин на натпревари во спортови во затворен простор и на мраз, додека други натпревари ќе се одржат во спортски кластери околу Кортина, како и во долините на Валтелина и Фијема.
Македонската делегација гордо продефилира на свеченото отворање, а честа да го веат националното знаме ја имаа нашата алпска скијачка Јана Атанасовска и крос-кантри скијач Ставре Јада.
