Економисти, правници, инженери, студенти, чекаат на ред за вработување во кафуле, сендвичарница, фотографска работилница, трафика

Економисти, правници, инженери, студенти... чекаат на ред за вработување во кафуле, сендвичарница, фотографска работилница, трафика. На пазарот на трудот има голема понуда на високообразовани кадри, а мала побарувачка од нив.

Во огласите за вработување, освен ако не се бараат специфични квалификации, веќе не се наведува потребното образование.

- Бараме неколку лица кои ќе работат на промоција. За огласот што го објавивме имавме голем број заинтересирани кандидати, претежно со високо образование и студенти, иако, рака на срце, за ангажманот што го бараме не е потребно повеќе од средно. Но, кога бираме, акцентот го ставаме на високообразованите, зашто се покажа дека тие полесно се снаоѓаат во работата, покомуникативни се и попродуктивни - вели еден огласувач.

Дека млади со диплома "се тепаат" за каква било работа потврдува и еден сопственик на сендвичарница во Скопје, кој во моментов бара работник. Младите дипломирани и невработени кадри, пак, велат дека не пребираат бидејќи сакаат да заработат, но веруваат дека еден ден ќе ја искористат дипломата. 

- Имам слободно време и веќе не сакам, а и не можам да бидам на товар на родителите. Секој ден ги следам огласите и не се двоумам, секаде праќам Си-Ви. Не ми е важна ниту платата, доволно е да ги покрива моите трошоци. Тоа само за почеток, а понатаму ќе видиме. Ама тешко се наоѓа, конкуренцијата од луѓе со факултетски дипломи е голема и тоа за секаква работа. Бев на интервју во едно фотографско студио, а по мене влезе електроинженер - вели една скопјанка која од дипломата на правен факултет ја дели еден испит.

Ако се прегледаат огласите во весниците и на специјализираните сајтови ќе се види дека од високообразованите најмногу се бараат доктори, фармацевти, информатичари, како и наставници за училишта. Има и понуда за по некој менаџер, но условите ограничуваат на кадри со добро искуство. Работно искуство, а и посебен сертификат се бара и за рецепционер во хотел, таму не пали дипломата. Работа за почетници, речиси и нема. Во поголемиот број огласи, без разлика дали се бара доктор, агент за недвижнини, правник за адвокатска канцеларија или келнер, потенцирано е дека кандидатот треба да ги има фамозните три до пет години искуство во струката. 
- Завршив бизнис менаџмент. Кога се запишав се сметаше дека струката има перспектива. Ама нас никој не не бара и ако има оглас, се бараат луѓе со дебело искуство. А како да го стекнеме? Веќе две години работам по кафулиња и ги следам огласите во надеж дека ќе најдам соодветна работа - вели една млада скопјанка,

Хиперпродукцијата на високообразовни кадри несоодветни на потребите на стопанството, посебно на правници и економисти и дипломци од општествените науки ја фрли во сенка важноста на универзитетската диплома. Најбарани на пазарот на трудот во моментов се квалификуваните работници и тоа не од сите струки. Предводат занимањата во градежништвото и тие се веќе препознаени, па за нив има обуки во Агенцијата за вработување. 

air max 90 essential sale