Македонија ќе има еден претставник на 27. Европско првенство во атлетика во Бирмингем – маратонецот Дарио Ивановски, кој ќе застане на стартот на една од најтешките дисциплини во атлетиката.
Маратонската трка е закажана за 16 август, со почеток во 8:10 часот по македонско време. На стартот ќе се појават 64 маратонци од Европа, а Ивановски е рангиран на 36. место.
Местото на Европското првенство го обезбеди со резултати кои му ја донесоа потребната норма. Зад себе веќе има и македонски рекорд – во февруари 2024 година на маратонот во Севиља истрча 2 часа, 8 минути и 26 секунди, поставувајќи го националниот рекорд.
Годинава Ивановски продолжи со одлични настапи. На маратонот во Белград постигна време од 2:09:35, што е негов втор најдобар резултат во кариерата. Сега пред него е големата европска сцена. Во конкуренција на најдобрите маратонци од континентот, Ивановски ќе се обиде повторно да го помести сопствениот лимит и да стигне до уште еден резултат за паметење.
Македонија ќе има само еден атлетичар во Бирмингем. Но, на 16 август, сите наши погледи ќе бидат насочени кон него.
