Две патнички од превртениот автобус кај Лесковац се борат за живот

Од повредените во несреќата во Лесковац, двете патнички кои беа најтешко поврдени се борат за живот, откако на едната од нив состојбата ѝ се влошила, дознава „Блиц“.

Се работи за С.Т. и И.Ј., кои се хоспитализирани на Клиниката за анестезија и интензивна терапија во Ниш и кои и понатаму се приклучени на машина за дишење и животите им се загрозени.

Останатите четворица повредени кои се лекуваат во Клиничкиот центар во Ниш се вон животна опасност.

С.Т. има повреда на карлицата и е интубирана, но е во животна опасност. На машина за дишење е и пациентката И.Ј. која доминантно е загрозена поради фрактура на пршлен со заканувачка компресија на ’рбетниот мозок. Нејзината состојба е влошена и таа е животно загрозена.

Во единицата за интензивна нега на Клиниката за анестезија и интензивна терапија се наоѓаат Р.Д. и пациентката А.К.,  кои се стабилни, свесни и вон животна опасност, изјавил директорот на Клиниката, проф.д-р. Радмило Јанковиќ.

Трагичната сообраќајка се случи во неделата околу 2 часот кога автобусот што сообраќал на релација Штип-Виена излетал од патот и се превртел. При тоа загинаа тројца, а 32 беа повредени.

Причините за несреќата се уште не се познати, иако се шпекулира дека е виновен возачот, кој исто така е повреден, но и дека друго возило ненадејно сопрело поради што автобусот за да го избегне излетал од патот.