Доколку се наоѓате во главниот град, манастирот Никола Шишевски е совршено место за да ја одморите душата.Според сочуваните изворни податоци, се дознава дека манастирот за време на 15 и на 16 век претставувал силен и активен културен центар во околината на Скопје.
Свети Никола Чудотворец е заштитник на поморците и на сиромашните, еден од најсаканите христијански светци и најголем дел од Македонците имаат слава токму на 19 декември, Св. Никола. Меѓу можните причини за големата популарност на Свети Никола кај Македонците е и тоа што огромен број цркви го носат неговото име и ја одбележуваат славата. Една од нив е и манастирската црква „Св. Никола“ во селото Шишево во Матка.
Македонскиот просветител Јордан Хаџи Константинов – Џинот во својот напис „Јужна страна скопска“ од 21 мај 1855 година во „Цариградски весник“ за селото Шишево, а кај него стои Шешево, запишал дека е основано на реката Треска до манастирите „Свети Никола“ и „Свети Андреја“. Понатаму, запишал дека во селото има стара црква со едно кубе, храм „Свети Никола“, со славјански ракописи, како и шест цркви разорени и други старини, велат историчарите.
Според најстарите сочувани фрески, црквата, најверојатно, била изградена и живописана во втората половина на 14 век. На фасадата се препознаваат неколку сполии т.е. камени делови, остатоци од антиката, а употребени како градежен материјал при изградбата на црквата. Се претпоставува дека припаѓале на антички храм т.е. светилиште што се наоѓало во близината. Денес видливиот фрескоживопис датира од 1630 година.
Според сочуваните изворни податоци, се дознава дека манастирот за време на 15 и на 16 век претставувал силен и активен културен центар во околината на Скопје. Зачувани се имињата на тројца игумени на манастирот: Јаков, Самоил и Венјамин. Од нив, особено е активен првиот, Јаков, кој го управувал манастирот од 1630 година до 1645 година. Во негово време црквата била одново живописана, биле купени значителен број книги за потребите на манастирот и бил купен крст за олтарната преграда. Кон крајот на 19 век, како резултат на сѐ позачестените напади на локалните арнаутски банди, манастирот бил целосно запустен.
Денес, манастирот „Св.Никола Шишевски“ претставува едно од најубавите места на Матка. Има малку пишуваните извори за овој манастир, но, сепак, во еден препис на манастирски поменик се споменува дека во подигањето и во живописувањето на постарата црква помагал кралот Марко, така што може да му се припише ктиторство. Не се знае точно кој бил ктиторот и на новата црква, а се претпоставува дека лично се заложил скопскиот митрополит Симеон.
Манастирската црква се состои од две градби. Постарата првобитна градба претставува еднокорабна црква. Западниот дел е збиен, граден од камен и од тула и неговите фасади се расчленети со аркади. Во црквата „Св. Никола“ има два слоја живопис. Старите фрески потекнуваат од 14 век и се делумно откриени под живописот од 17 век. Од старите фрески видливи се ликовите на четворица свети оци на северниот и на јужниот ѕид на олтарот и двајца свети воини во наосот. Тоа се светите воини Ѓеорги и Димитрија облечени во современи владетелски одежди, со високи капи. Според досега познатите фрески од првиот слој живопис, се чини дека го изработиле двајца сликари што припаѓаат на племенско-монашката група сликари од втората половина на 14 век.
Живописот од 1630 година кој се наоѓа во втората црква, односно во припратата, е мошне добро зачуван. Во долната зона се сликани одделни светители, над нив сцени од животот на св. Никола, а во горните зони се сцените од чудата и маките на Исус Христос.
Сместен е високо на една зарамнета тераса на карпите, над десниот брег над вештачкото езеро Матка над реката Треска. Теренот е недостапен за моторни возила и планински велосипеди и е единствено достапен пеш од три правци: од мостот на реката Треска во близина на кајакарските терени кај манастирот Света Богородица вo Долна Матка (половина час пешачење); од селото Шишево (1 час); како и од врвот на планината Водно (2 часа и 30 минути). Од градот Скопје е оддалечен 18 километри, а од селото Шишево околу 3 километри. Од спротива на манастирот долу крај езерото се пружа прекрасна глетка на позната црква Манастир Свети Андреја.
Доколку се уште не ви е јасно како да стигнете до ова парче рај, ние ве советуваме за наједноставниот начин, преку самиот мост на Треска. Имено, патот до Матка веќе на сите ви е познат. Најбрзо е да стигнете со автомобил, но постојат и редовни автобуски линии. Во непосредна близина на последната автобуска станица која остава за да се стигне до кањонот, се наоѓа и мостот преку кој се преминува реката Треска.
Потоа, ја следите планинарската патека, која иако е тесна и е доволна само за еден човек, сепак не е премногу долга, па се минува брзо. Оние навикнати да пешачат, можат да ја поминат и за половина час, за оние понеспремните, најмногу, 45 до 50-на минути. Попатно ќе наидете на прекрасни пејзажи од кањонот, а крајната дестинација ќе ве воодушеви со својата интимна атмосфера и природна убавина.
За враќање, најлесно ви е или по истиот пат, или по каменливата удолнина кое се наоѓа зад ѕидот каде што се и клупите. Во секој случај, доколку имате лизгави обувки на себе, не ви ја препорачуваме оваа опција. Но, доколку се одлучите за неа, знајте дека ќе излезете од спротивната страна на езерото, карши ресторанот. На левата страна се наоѓа дрво на кое е закачена метална плоча, на која ќе треба неколку пати да чукнете. За кусо време ќе пристигне мало кајче да ве пренесе, кое ќе ве чини околу 30-40 денари.
На овој начин ќе можете да го искористите остатокот од времето да прошетате и низ долниот дел на кањонот.
