Како што беше најавено деновиве, градот Скопје започнува со активности околу подготовка на Градска стратегија за безбеден сообраќај.
- Доста е со премолчување на сообраќајниот хаос. Нашата цел не е само „подобар“ град, туку сигурен дом. Кацигата не смее да стане дел од училишниот прибор. Скопје не е патека за „Слалом Опен“. Тротоарите не се паркинзи за џипови, вели претседателот на Советот на Град Скопје Даме Димитровски.
Тој е на став дека скопјани не бараат спектакуларни формули. Бараат практични решенија за секојдневните предизвици.
- Како претседател на Советот, професор и родител, ја поставувам безбедноста како еден од деветте столбови за развиено Скопје. Ја започнуваме имплементацијата на новата градска стратегија „Визија Нула“ за периодот 2026–2030. Ова е повеќегодишен план со конкретни активности кои воведуваат меѓународни стандарди за безбедност на нашите улици, вели Димитровски и ги сподели клучните столбови на стратегијата:
НУЛА ДЕЦА ЖРТВИ - Ова е нашиот единствен прифатлив резултат. Преку програмата „Safe to School“ обезбедуваме физички заштитени и осветлени коридори до секое училиште и градинка. Патот до знаењето не смее да биде опасност.
ТРОТОАРОТ Е ЗА ПЕШАКОТ. ТОЧКА - Ставаме стоп на узурпацијата на јавниот простор. Пешачките зони ќе бидат ослободени и проодни.
ЗОНА 30 ВО СЕКОЕ МААЛО - Го намалуваме темпото таму каде што се живее и каде што децата си играат.
ПАМЕТЕН НАДЗОР И ПРЕВЕНЦИЈА - Воведуваме технологија која не простува на дивеењето по улиците. Спасувањето животи во несреќа е херојско дело, но наша задача е да работиме паметно и да вложиме во превенција за воопшто да не дојде до несреќите.
Не прифаќаме изговори дека „ова е Скопје и така се вози“. Тоа е само лош параван за неодговорност. Ова е Скопје какво што го сакаме. Град каде безбедноста е право, а не луксуз. Од страв на улица до сигурност за сите. За Скопје кое конечно се грижи, дециден е претседателот на Советот на Град Скопје.
