Денеска ново рочиште за пожарот во дискотеката „Пулс“ во Кочани на кое се очекува да сведочат очевидци на кобната ноќ во која, заради инстиутуционална нефункционаност и корупција, животот го загубија 63 лица, а над 200 беа повредени.
На денешното рочиште се повикани пет сведоци предложени од Јавното обвинителство, а обезбедени се четворица.
На претходното рочиште, беше донесена одлука да нема спојување на тековната и на постапката за 13 полициски службеници. Ваква одлука донесе Судскиот совет со образложение дека процесот е во доказна постапка, а спојувањето на двата предмета во еден ќе резултира со одолговлекување и неекономичност на процесот.
Пожарот во дискотеката „Пулс“ во Кочани избувна ноќта на 16 март минатата година, за време на настап на групата ДНК. Во трагедијата загинаа 63 лица, а над 200 беа повредени.
Процесот се одвива под засилени безбедносни мерки, а постапката се води против повеќе од 30 физички и три правни лица за тешки дела против општата сигурност.
Обвинителството го застапува тим од 15 јавни обвинители. Судењето продолжува со изведување докази и сослушување сведоци.
