Македонскиот кошаркарски репрезентативец Дамјан Стојановски повторно е член на МЗТ Скопје Аеродром.
Стојановски вчера попладнево ги заврши сите формалности околу потпишувањето на новиот едногодишен договор со шесткратниот првак.
Ова всушност е и продолжување на неговиот престој во сино-белиот табор по едногодишната пауза, која 29-годишниот бек беше приморан да ја направи по повредата на лигаментите на десното колено за време на репрезентативните настапи во ланските квалификации за ЕП 2017.
Претходно, уште од 2012 година, Стојановски беше член на „металците“ со кои дојде до четири шампионски титули (2013-2016) како и пет пехари во Купот на Македонија.
Дамјан сега е третиот член на националната селекција на Македонија во дресот на МЗТ Скопје Аеродром за следната сезона, по Марко Симоновски и Адем Мекиќ, а договорна обврска со нашиот клуб во моментов има и Американецот Ксавиер Темс.
Потсетување дека од вчера нов тренер на екипата е Александар Тодоров, човекот кој пред шест години ја донесе првата титула во „Јане Сандански“.
