Центарот за управување со кризи извести дека вчера биле регистрирани 14 пожари на отворено на територијата на државата, покрај интервенциите за гаснење пожари во населени места. Гореле запалени депонии, ниска дабова шума, мешана шума, ниска вегетација, стрништа, меѓи од ниви, трска, капини и врби. Сите пожари како што стои во известувањето се изгаснати.
ЦУК информира дека во последното деноноќие имало вкупно 1 989 повици на Единствениот повикувачки број за итни случаи 112. Од нив „реални“ повици биле 59 отсто, а 41 отсто биле за други потреби на граѓаните што не биле итни. Кон полиција биле упатени 71 отсто, кон итната медицинска помош 21 отсто, а кон пожарникарите 6 отсто од реалните повици кон 112.
Вчера на Единствениот повикувачки број 112 за итни повици во ЦУК, биле примени два повика за помош во планина, еден за помагање на повреден моторџија со скршеница на ногата и еден повик за пронаоѓање група планинари коишто не можеле да контактираат до доцна синоќа.
„РЦУК Скопје известил дека преку број за итни повици 112 во ЦУК, вчера во 13:44 часот е добиена дојава за повреден моторџија кој паднал од мотор на место викано „Рамно“ над Чучер-Сандево. Повредениот моторџијата се здобил со скршеница помеѓу зглобот и коленото на ногата. За настанатата состојба веднаш биле известени Итна медицинска помош кои тргнале на терен. ЦУК по остварениот контакт со лицето што пријавува доби известување дека се работи за поголема група на моторџии и истите дека го пренесат со теренско возило до пристапно место каде што лицето може Итната медицинска помош да го преземе, по што безбедно е пренесено во болница“, соопшти ЦУК.
На повикувачки број 112 во ЦУК, вчера, во 21.35 часот било пријвено дека група од 12-лица планинари заминале во планинскиот предел на Шара над Општина Тераце, односно над село Пршовце, со цел да одат во местото „Доброшки Езера“, но во вечерните часови не можеле да воспостават контакт. Пријавителот информирал дека последната локација била во месноста „Три Чешми“ во близина на границата со Косово. Лицата се пронајдени во 22:05 часот ноќта, соопшти ЦУК.
