Претседателот на УЕФА, Александар Чеферин престојуваше во официјална посета на Фудбалската федерација на Македонија, на покана од претседателот на ФФМ, Масар Омерагиќ.
Во делегацијата предводена од Чеферин се и Зоран Лаковиќ, директор за национални асоцијации во УЕФА, како и Денис Бастари, раководител за развој на национални асоцијации.
Омерагиќ ја оцени посетата како значајна за македонскиот фудбал, истакнувајќи дека таа претставува потврда за соработката со европската куќа на фудбалот и поддршка за реформските процеси. „Посетата на Александар Чеферин е вистинска потврда на нашето пријателство и искрениот однос што го имаме со раководството на УЕФА. За нас е особено важно што во изминатата година спроведовме сериозни реформи во повеќе сегменти, од структурни и организациски промени, преку подобрување на инфраструктурата, до јасна стратегија за развој на младинскиот фудбал“, изјави Омерагиќ.
Тој додаде дека на средбите биле разменети информации за состојбите во македонскиот и регионалниот фудбал, при што се разговарало за клучните предизвици и идни чекори. „Оваа поддршка и разбирање од УЕФА е силен поттик да продолжиме со реформите и да го развиваме македонскиот фудбал на највисоко можно ниво“, посочи Омерагиќ.
Во рамки на посетата, Чеферин оствари средби со државниот врв, вклучително и со премиерот Христијан Мицкоски и министерот за спорт Борко Ристовски. Предвиден е и работен состанок во „Куќа на фудбалот“.
