Брзо и лесно до пари, одобрување на кредитот за неколку часа, без жиранти, парите веднаш легнуваат на вашата сметка… Ова се само мал дел од рекламните пораки што секојдневно ги слушаме и со кои се рекламираат таканаречените брзи кредити.
Граѓаните постојано се задолжуваат во банките, покажуваат податоците.
-Да не се банките и кредитите, не би знаеле како ќе живееме. Не зборувам за луксуз, зборувам за основни работи, кои се потребни за едно семејство...
Долговите, како што веќе подолго време е тренд, во најголем дел се направени преку земање потрошувачки кредити, но она што е позитивен сигнал е дека тие повеќе се земаат за купување телевизори, машини за алишта, компјутери, отколку за прехранување и за покривање на веќе направени минуси.
Банките продолжуваат со својата политика за олеснување на условите за потрошувачки кредити, покажува анкетата што ја објави Народната банка. Граѓаните, пак, лесно посегнуваат по банкарските понуди и нивните долгови сè повеќе растат.
Од Народната банка укажуваат дека ќе продолжи трендот на пораст на кредитирањето, а според сегашните математики, секое семејство во Македонија должи по 3.800 евра.
-Како со нашите плати да купиме нов електричен апарат? Па и тие имаат рок на траење. Пред две години ни се поквари фрижидерот, кој го имаме скоро 30 години. И тоа во сред лето. Да оделиме од плата, не можеме. Среќа што банките се расположени за оние како нас. Го земавме и го исплативме. Децата така ги шолуваме. Постојано сме во минус. Среќа, што тоа е дозволено, раскажува Светлана од Марино.
