На големиот христијански празник Богојавление – Водици, на 19 јануари, ќе продолжи вековната православна традиција на осветување на водите и положување на Светиот крст во повеќе делови на Скопје, меѓу кои Сингелиќ и Волково.
Централниот настан во населбата Сингелиќ ќе се одржи во дворот на Црква Св. Ѓорѓи Победоносец, каде чинот ќе започне во 10:00 часот. Светиот крст ќе биде положен во базенот во црковниот двор, по што ќе следи осветување на водите, симболичен чин кој носи благослов, здравје и духовна сила за верниците и нивните домови.
Во исто време, традицијата ќе продолжи и во општина Ѓорче Петров. Во 11:00 часот, Светиот крст ќе биде положен во водите на реката Лепенец, во скопската населба Волково, каде се очекува присуство на голем број верници.
Светиот крст, како симбол на победата на животот над смртта, надежта, спасението и Божјата љубов, преку осветувањето на водите го означува духовното прочистување и обновувањето на верата. Осветената вода традиционално се носи во домовите и се чува во текот на целата година како знак на заштита и благослов.
Организаторите упатуваат покана до сите верници и православниот народ да присуствуваат на настаните во Сингелиќ и Волково, заеднички да се помолат и да ја споделат радоста на празникот, продолжувајќи ја вековната традиција на Богојавление – Водици.
