Постојат луѓе кои влегуваат во нашите животи како благослов.
Photo by Artem Kovalev on Unsplash
Со својата добрина, топлина и поддршка тие нè потсетуваат дека сме доволни токму такви какви што сме. Благодарам на оние кои ме гледаа со чисти очи, кои ме прифатија без услови и кои ме охрабруваа да верувам во себе и тогаш кога самата тешко верував. Нивните зборови, гестови и присуство ми беа огледало на мојата сила и мојата вредност.
Но благодарноста ја должам и на оние кои не беа добри. На оние што со својата ладност, молк или омаловажување ми покажаа колку болат границите што не ги заслужуваме. Тие ме научија дека тишината некогаш знае да биде потешка од зборовите, а одбивањето да боли повеќе од искрената критика. Иако нивната улога не беше нежна, сепак ме поттикна да не ја барам својата вредност во туѓите очи, туку да ја препознаам во себе.
Постојат и луѓе кои нè гледаат како огледало на сопствените болки. Со нив научив дека не секое однесување е заради мене – понекогаш е само одраз на нивната внатрешна борба. И за тоа сум благодарна, затоа што ме научи на сочувство, но и на потребата да се грижам за сопствените граници. Од тие средби излегов посилна, помалку наивна, но со подлабока љубов кон себе. Истовремено, благодарам на оние што ми даваа простор да бидам сè – и гласна и тивка, и сигурна и кревка, и радосна и тажна. Тие луѓе ми ја покажаа убавината на автентичноста, без маски и улоги. Благодарение на нив научив дека вредноста не е во тоа да се вклопуваме, туку во тоа да останеме верни на своето срце.
Сакам да им се заблагодарам и на оние средби кои траеја кратко, но оставија длабоки траги. Некои луѓе дојдоа само да ми покажат колку можам да дадам љубов, а некои – колку повеќе треба да ја чувам за себе. Секоја средба, секоја врска, секој прекин беше дел од патот што ме води кон себе си.
На крај, благодарам на сите – и на оние што ме издигнаа, и на оние што ме повредија. Бидејќи од сите нив научив дека мојата вредност никогаш не зависи од тоа како некој друг ќе ме види, туку од тоа како јас ќе се препознаам себеси. Тие луѓе беа учители, секој на свој начин, и благодарение на нив денес стојам посилна, посвесна и повеќе своја.
