Во Скопје започнува нов проект за бесплатна психолошка поддршка на средношколци на возраст од 15 до 19 години, со цел да им се обезбеди стручна помош, емоционална поддршка и безбеден простор за разговор.
Проектот ќе се реализира преку две клучни активности. Првата опфаќа бесплатно индивидуално психолошко советување, наменето за разговор, разбирање и стручна поддршка на младите. Советувањата ќе се одржуваат на три локации – Козле, Аеродром и Центар.
Втората активност се едукативни работилници наменети за стручен кадар и родители од 23 средни училишта, со фокус на превенција од насилство, справување со зависности и унапредување на менталното здравје кај младите.
„Ниту едно дете, ниту еден млад човек не смее да се чувствува сам, заборавен или оставен без поддршка. Младите заслужуваат внимание, разбирање и систем што навреме ќе ги препознае нивните потреби и ќе им подаде рака кога тоа им е најпотребно“, порача градоначачникот на Град Скопје Орце Ѓорѓиевски.
Заинтересираните можат да добијат повеќе информации и да закажат термин на телефонскиот број +389 75 422 781.
Носители на проектот се Асоцијацијата „Гаспар“ и „Лумен“.
