Балетот „Дамата со камелии“ повторно во НОБ

 Балетската претстава „Дамата со камелии“ на музика од Џузепе Верди е повторно на сцената на Националната опера и балет вечер од 20 часот, со првенците Марија Кичевска-Шокаровска и Бобан Ковачевски во главните улоги.

– „Дамата со камелии“ премиерно беше изведена на 31 октомври 2014. Оваа балетска продукција наиде на одличен одѕив кај публиката и беше оценета со позитивна критика,  Работена по музиката на Верди, а драматуршката подлошка е земена од неговата популарна „Травијата“, соопшти НОБ.

Кореографијата е на Василиј Медведев од Русија, кој работи со големите театри „Бољшој“ од Москва и „Марински“ од Санкт Петербург. Костимите и сценографијата во оваа раскошна балетска претстава ги изработи Павол Јураш од Словачка.

Настапуваат солисти, балетскиот ансамбл и оркестарот на Националната опера и балет, под диригентство на Иван Еминовиќ.