Општина Аеродром продолжува со уредување и збогатување на јавните простори со нови содржини за спорт и рекреација. Во паркот „Патрик“ веќе е поставена првата од вкупно пет фитнес зони планирани за оваа година.
Новите фитнес зони во следниот период ќе бидат поставени и во Острово, Ново Лисиче, Тодор Чангов и Долно Лисиче, со што жителите од повеќе населби ќе добијат можност за бесплатно вежбање во непосредна близина на своите домови.
Зоните се опремени со справи за калистеника и вежбање на отворено, наменети за различни видови физичка активност и достапни за граѓани од различни возрасни групи и нивоа на физичка подготвеност.
„Сакаме Аеродром да биде општина во која активниот и здравиот начин на живот ќе биде достапен за сите. Со поставувањето на новите фитнес зони создаваме места каде што граѓаните можат бесплатно да вежбаат, да се рекреираат и да поминуваат поквалитетно време во својата населба“, изјави градоначалникот Дејан Митески.
Од Општината посочуваат дека целта е парковите и јавните површини во сите населби да станат пофункционални и поатрактивни места за активно поминување на слободното време, за деца, млади, возрасни и повозрасни граѓани.
