Во текот на изминатиот викенд (11 и 12 јули), полициските службеници на патиштата низ државата санкционирале 1.426 сообраќајни прекршоци, а 64 лица биле лишени од слобода поради безобѕирно управување со возило.
Според податоците на Министерството за внатрешни работи, најголем дел од прекршоците – 455 – се однесуваат на возачи кои ја надминале дозволената брзина.
Меѓу приведените, 27 лица управувале возило без возачка дозвола, 11 биле под дејство на алкохол, по еден возач бил затекнат со брзина значително над дозволената во населено и надвор од населено место, а едно лице управувало возило и покрај претходно изречена забрана.
Во истиот период, полицијата одзела 22 возила согласно член 300-б од Кривичниот законик.
Контролите откриле и 187 случаи на неправилно паркирање, 61 санкција за возење под дејство на алкохол, 126 мотоциклисти без заштитен шлем и 150 возачи и патници кои не користеле сигурносен појас.
Дополнително, од сообраќај биле исклучени 24 нерегистрирани возила и седум технички неисправни возила, а санкционирани биле и двајца возачи поради непрописно затемнети стакла.
Од МВР најавуваат дека засилените сообраќајни контроли ќе продолжат и во наредниот период, со апел до сите учесници во сообраќајот доследно да ги почитуваат правилата и прописите за поголема безбедност на патиштата.
