Завршени се 90 отсто од градежните работи за целосна реконструкција на Домот на културата во с. Кучково.
Со реконструкцијата, која ќе чини 5 милиони денари, Домот ќе добие нова сала за состаноци, простории за амбуланта со чекалница, канцеларија за месната заедница и два санитарни јазли. Поставени се нови прозорци и врати, под и покривна конструкција. Воведена е комплетно нова водоводна и електрична мрежа. Градежните работи ги изведува „Свеан инвест“ ДОО Скопје, соопшти Општина Ѓорче Петров.
„Домот во Кучково беше опожарен уште во 2003 година и со години не беа преземени никакви градежни зафати. Со реконструкцијата мештаните ќе добијат современ објект каде што во иднина ќе може да се организираат разни средби и културни настани, а пред сѐ граѓаните ќе може да се дружат. Се очекува деновиве да се сработат преостанатите работи за партерното уредување, а домот треба да биде пуштен во употреба во втората половина од септември“, се додава во соопштението.