Успешно стартуваше големата акција на есенско чистење на Скопје. Во општина Бутел каде најпрво почна генералката на главниот град, изминативе два дена беа подигнати 300 кубни метри смет, шут и искастрена дрван маса.
Како што информираа од општина Бутел, стотици невработени беа ангажирани од Град Скопје и вработените во општина Бутел, задолжени за одржување на хигиената, поддржани со силна механизација од јавните градски претпријатија. Тие работеа на шест пунктови, односно во населените места: Бутел1, Бутел2, Радишани (населбата и селото), Скопје Север и Визбегово.
Изметени и измиени се главните сообраќајници, како и поголемите сервисни улици што се во надлежност на општина Бутел. Се собираше шут и смет од помали и поголеми депонии. Исчистени се 220 сливници и 78 шахти, а направено е издувување на канализациони линии во должина од 3 120 метри и искастрени се 95 дрва.
– Оваа голема акција за есенско чистење на градот која успешно почна од општина ќе стане традиционална. Освен тоа што сакаме да покажеме мобилност кога е хигиената во прашање, сакаме да влијаеме и на свеста на граѓаните да ја чуваат чиста околината во која живеат – изјави градоначалникот на општина Бутел, Велимир Смилевски.