Во Аеродром: Скопјанец истепал комунален редар бидејќи му пишал казна

Комунален редар од Град Скопје минатиот викенд бил истепан од граѓанин на кој му пишал казна оти се паркирал во зеленило во населбата Аеродром, jaвува СДК.мк. Комуналните редари вршеле контрола низ општината и на булеварот Јане Сандански затекнале возило паркирано во трева. Пишувајќи казна за непрописно паркирано возило, редарите биле физички нападнати.

- Нашите редари и инспектори можат да пишуваат казни за паркирање во зеленило, додека за непрописно паркирање на улица немаме надлежност. Додека пишувале казна сопственикот на возилото оставено во трева го нападнал едниот редар и му удрил бокс. Направен е записник и случајот е пријавен во полиција, изјавил раководителот на Инспекторатот на Град Скопје, Мирослав Богдановски.

Тој додал дека ова не е прв пат инспекторите и редарите физички да бидат нападнати, а секојдневно се соочуваат со закани и одбивање да се легитимираат лицата кои направиле прекршок.