Успешен прв настап на македонски тим на трката „Ред Фокс Елбрус“

Македонски тим првпат се претстави на деветтото издание на трката „Ред Фокс Елбрус“ што се одржа викендов на највисокиот врв во Европа „Елбрус“ на Кавказ со 5.642 метри надморска височина.

Ова е прво учество на македонски тим на една од најтешките скајранинг трки во светот и е проект поддржан од Федерацијата на планинарски спортови на Македонија, информираат македонските учесници.

Македонскиот тим го сочинуваа Марјан Бонев, Александар Кирковски и Дејан Тодевски.

Главната трка „Скајмаратон“ на 14 километри со 3.300 метри позитивна денивелација, започна од полјаната Азау со надоморска висина од 2.350 метри до самиот западен врв на Елбрус со 5.642 метри над морето со временски лимит од 7 часа.

Александар Кирковски ја заврши трката за 5 часа и 35 минути на 26. место и со тоа го постави најдоброто време досега на еден Македонец на врвот Елбрус. Марјан Бонев од заврши за 5 часа и 45 минути на 28. место во генерален пласман. Дејан Тодевски се искачи на 5.350 мнв, но не го исполни временскиот лимит.

Победник на трката, Еквадорецот Карл Еглоф заврши за 3 часа и 24 минути, поставувајќи нов брзински рекорд во искачување на највисокиот европски врв.