Старт на реконструкцијата на улицата „Ѓорче Петров“, Шилегов моли за трпние

Екипите на Град Скопје ја почнаа реконструкцијата на улицата Ѓорче Петров на потегот од општинската зграда до бензинска пумпа на „Макпетрол“. Увид во градежните работи на оваа делница денеска изврши градоначалникот Петре Шилегов.

„Денеска ja почнуваме реконструкцијата на коловозот на дел од улицата Ѓорче Петров во должина од 1. 500 метри. Градежните работи очекуваме целосно да ги завршиме пред крајот на летото со цел овој сериозно оштетен коловоз да го ставиме во функција на граѓаните пред почетокот на новата учебна година, а тоа значи и да ја зголемиме безбедноста во сообраќајот. За реализација на оваа реконструкција од буџетот на Градот се издвоени околу 50 милиони денари“, изјави Шилегов.

Тој додаде дека реконструкциите на сите улици оваа градежна сезона Град Скопје ги завршува со рекордно куси рокови со цел да се обезбедат услови за одвивање на сообраќајот без создавање сообраќаен метеж.

При реконструкцијата на улицата Ѓорче Петров, која е една од најфреквентните улици во овој дел на градот, ќе се изврши целосно стругање на горниот оштетен слој на коловозот до 20 сантиметри на површина од 21.240 квадратни метри и ќе се нанесе нов асфалтен слој.

Во текот на летото ќе продолжат реконструкциите на повеќе булевари и улици во надлежност на Град Скопје. Поради тоа, Шилегов уште еднаш ги замоли граѓаните за разбирање додека траат градежните активности. Исто така, тој упати апел до сите учесници во сообраќајот да ја почитуваат поставената патна сигнализација и на дневна основа да ги следат информациите за привремен сообраќаен режим што ги објавува Град Скопје.