Со полиција се отстрануваше нелегално поставена урбана опрема во Центар

Денес, Секторот за инспекциски работи на Општина Центар, со полициска придружба постапуваше по 14 решенија за отстранување на нелегално поставена урбана опрема.
Акцијата опфати локали, кафе барови и други објекти кои нелегално имаат поставено урбана опрема (тераси, монтажни конструкции итн.), меѓу кои е и конструкцијата поставена пред ноќниот клуб Џубокс во Дебар Маало.

- Продолжуваме неселективно со борба против беззаконието и урбаниот хаос, со цел воведување на ред во поставувањето на урбаната опрема на јавен простор. Повторно повикувам угостителите и одговорните лица да се придржуваат до законските решенија и правилници за поставување на урбана опрема - апелира градоначалникот на Центар, Саша Богдановиќ.