Под силно полициско обезбедување од редовната и специјалната полиција, во Основниот суд Скопје 1 денес започна судскиот процес против 29 обвинети за настаните во кумановската Дива населба во мај минатата година.
Движење на редовната и специјалната полиција може да се забележи на повеќе места во центарот на градот.
Обвинетите се товарат за сторени кривични дела „терористичка организација” од чл. 394-а и „тероризам” од чл. 394-б од Кривичниот законик.
На 7 декември минатата година сите 29 обвинети лица за тероризам пред Советот од судии од Основниот суд Скопје 1 се изјаснија дека не се чувствуваат виновни за делото „тероризам“.
На 9 и на 10 мај минатата година во кумановската Дива населба вооружена група се судри со безбедносните сили. Во престрелката загинаа осум полицајци од специјалните и посебните единици на МВР, додека четириесетина беа тешко повредени. Убиени беа и десет лица од вооружената група.