Полни трибини за реваншот Вардар - Флензбург

Реванш натпреварот меѓу Вардар и Флензбург ќе се игра пред полни трибини во СЦ „Јане Сандански“ во Скопје.

Според официјалниот веб сајт „тикетсплус.мк“ на кој се продаваат влезниците за овој четвртфинален меч во ракометната Лига на шампиони, речиси целиот капацитет на салата е распродаден.

Во продажба има останато само уште десетина влезници за блоковите за седење и нешто повеќе за трибината за стоење. Но, се очекува истите да бидат распродадени до денот на натпреварот, затоа што интересот за македонско-германскиот дуел е огромен.

Македонскиот првак Вардар ќе има голема поддршка во обидот за прв пат во историјата да се избори за место на завршниот „фајнал-фор“ турнир, односно полуфиналето во Келн.

Вардарци во реванш дуелот со Флензбург, покрај поддршката од трибините ќе имаат и предност од два гола остварена на првиот меч одигран во саботата во Германија кога славеа победа со 26-24.

Реванш дуелот меѓу Вардар и Флензбург се игра во четврток со почеток од 19 часот.