Нови 72 милиони евра за малите и средни бизниси

Нови 72 милиони евра за евтини кредити за малите и средни претпријатија преку Европската банка за обнова и развој, најави министерот за финансии Кирил Миноски кој учествува на Пролетните средби на ММФ и Светска банка во Вашингтон.

Станува збор за програма на Европската банка за обнова и развој (ЕБОР), која се однесува на поддршка на земјите од Западен Балкан во вкупен износ од 360 милиони евра, од кои Македонија има право на користење на 20 отсто од фондот.

– Македонија веќе ја испрати апликацијата – акциониот план до Бордот на ЕБОР. Со оваа програма се решава еден дел од корпусот на прашања кои се поврзани со пристапот до финансии, кои се многу значајни за приватниот сектор врз кој почива македонската и речиси сите економии во светот – вели Миноски.

Евтините кредити за малите и средни претпријатија ќе се нудат во домашната валута, преку комерцијалните банки, директно преку ЕБОР или со кофинансирање 50-50% ЕБОР со банките. Каматната стапка е повластена од 4 до 5%.

За средствата од оваа програма ЕБОР не бара договор за заем или државна гаранција.

Евтини кредити за малите и средни претпријатија во Македонија беа пласирани и преку кредитната линија на ЕИБ во износ од 350 милиони евра.